Joriy yilning 3-iyul kuni Toshkent shahar statistika boshqarmasida Toshkent davlat iqtisodiyot universitetining “Iqtisodiy statistika” kafedrasi filiali ish boshladi.
Tantanali ochilish marosimida boshqarma boshlig‘i L. Mirsoatov, TDIU prorektori S. Mexmonov, soha mutaxassislari, professor-o‘qituvchilar va OAV vakillari ishtirok etdi.
Filialning tashkil etilishi — Prezidentimiz tomonidan ilgari surilgan statistikani zamonaviy bosqichga olib chiqish tashabbuslari hamda oliy ta’lim va amaliyot integratsiyasini chuqurlashtirish yo‘lidagi muhim qadamlardan biridir.
Bu yerda nafaqat yuqori malakali professor-o‘qituvchilar, balki tajribali mutaxassislar ham ta’lim jarayoniga jalb etiladi. Bu esa nazariya va amaliyot uyg‘unligini ta’minlab, talabalarga to‘g‘ridan-to‘g‘ri statistik organlarda malakaviy amaliyot o‘tash imkonini beradi.
Tadbir davomida ishtirokchilar filialda yaratilgan zamonaviy infratuzilma, o‘quv va ilmiy-tadqiqot faoliyati uchun yaratilgan shart-sharoitlar bilan tanishdilar.
Mazkur tashabbus statistikani ta’lim va fan bilan integratsiyalashgan holda yangi bosqichga olib chiqishga xizmat qiladi.